လီဗာပူးလ်ကတော့ ရိန်းဂျားစ်ကို ၇ ဂိုးအထိ သွင်းပြီး ပေါက်ကွဲပြလိုက်ပါတယ်။ ပရီးမီးယားလိဂ်မှာ အခြေအနေမဟန်သမျှအတွက် စကော့တလန်ကလပ်ပေါ်ကို ပုံချခဲ့သလားတောင်ထင်ရပါတယ်။ ရာသီအစတုန်းကလည်း သူတို့အခြေအနေမကောင်းချိန်မှာဘုန်းမောက်နဲ့တွေ့တော့ ၉ ဂိုးအထိသွင်းပြီး ပေါက်ကွဲခဲ့ပါသေးတယ်။ ဒါပေမယ့် အဲဒီနောက်မှာလည်း ဒုံရင်းကဒုံရင်းပြန်ဆိုက်ခဲ့ပြီး အခုလည်း နောက်တခါ ဂိုးပြတ်နိုင်ပွဲယူခဲ့ပြန်ပါပြီ။ ဖြစ်ချင်တော့ သူတို့လာမယ့်ပွဲက မန်စီးတီးနဲ့ပါ။ ဒီရာသီရှုံးပွဲမရှိသေးတဲ့အသင်းကိုရင်ဆိုင်ရမှာဖြစ်ပြီး လက်ရှိအနေအထားအရတော့ သူတို့က အောက်အသင်းဖြစ်နေတာပါ။ဒိတော့ မန်စီးတီးနဲ့ပွဲမှာ သူတို့အနိုင်ရဖို့ဆိုတာက မသေချာပါဘူး။ ဒါကြောင့် အနိုင်သေချာတဲ့ပွဲမှာ ဂိုးတွေရသလောက်သွင်းပြီးတေ့ာ စိတ်ပိုင်းဆိုင်ရာအရ အင်အားဖြည့်လိုက်ပုံရပါတယ်။ ဆာလာက လူစားဝင်လာပြီးတော့ ၆ မိနစ်နဲ့ ၁၂ စက္ကန့်အတွင်းမှာပဲဟက်ထရစ်ရယူခဲ့ပြီး ချန်ပီယံလိဂ်သမိုင်းမှာ အမြန်ဆုံးဟက်ထရစ်သွင်းဂိုးရှင်ဖြစ်လာပါတယ်။ ဖာမီနိုကလည်း ပုံမှန်ခြေစွမ်းပြပြီး ၂ဂိုးသွင်းခဲ့ကာ ဒါဝင်နူနက်ဇ်နဲ့ အီလီယော့တို့က တဂိုးစီသွင်းခဲ့ကြပါတယ်။ သူ့အသင်းတိုက်စစ်ပိုင်းက ကစားသမားတွေ အားလုံးနီးပါးဂိုးတွေရခဲ့တာက ကလော့ပ်အတွက်တော့ အားတက်စရာပါပဲ။မန်စီးတီးက ပြိုင်ပွဲစုံရှုံးပွဲမရှိသေးတဲ့အသင်းပါ။ ပြီးခဲ့တဲ့ချန်ပီယံလိဂ်ပွဲမှာ ဂိုးမရှိသရေကျခဲ့တာလွဲရင် ကျန်ပွဲတွေမှာ အနည်းဆုံးတပွဲကို ၂ ဂိုးနှုန်းသွင်းယူနေပြီး ခြေစွမ်းပြနေတာပါ။ ပြီးတော့ ဟာလန်းကိုလည်း အနားပေးထားပြီး လီဗာပူးလ်နဲ့ပွဲအတွက် ချန်ထားတာပါ။ဒီတော့ မန်စီးတီးက လီဗာပူးလ်နဲ့ပွဲကို ပိုအာရုံစိုက်ထားတာ သေချာပါတယ်။ ကလော့ပ်အတွက်လည်း အခက်ခဲဆုံးပွဲတပွဲကို ရင်ဆိုင်ရမှာဖြစ်ပြီး အရေးမလှရင်တော့ သူတို့ရဲ့ ဒီရာသီ အမှတ်ပေးပြိုင်ပွဲအတွက်က ပိုပြီးခက်ခဲသထက် ခက်ခဲလာမှာလည်း သေချာပါတယ်။လောလောဆယ်တော့ သူတို့ရဲ့ ဂိုးတွေရသလောက်သွင်းပြီး မန်စီးတီးကို သတိပေးလိုက်ပါတယ်။ ပွဲနေ့ကျရင် ဘာတွေဖြစ်လာမလဲဆိုတာ စောင့်ကြည့်ရမှာပါ။
